Култивирањето на земјата најверојатно би бил најдобриот начин да се обезбедува храна за првите доселеници на Марс, но колку е возможно таму да се засадат и растат семиња од Земјата?
За да го истражат ова, Интернационалниот центар за компири (CIP) – што, инаку, е вистинска институција – минатиот февруари започнал проект наречен „Компири на Марс“.
Доколку го имате гледано филмот „Марсовец“ (Martian) со Мет Дејмон, ќе се сетите на сцената каде неговиот карактер сади компири за да може да преживее на Марс. Сега, излегува дека таа сцена и не била толку „научно-фантастична“, бидејќи CIP работеле во тандем со Истражувачкиот центар Амес на NASA за да откријат дали компирите можат да растат во атмосферските услови на црвената планета.
Плод од компир бил засаден во CubeSat – затворена средина специјално дизајнирана од инженери од UTEC (Универзитет за инженеринг и технологија) во Лима. Потоа, почва земена од Pampas de La Joya пустината во јужно Перу, која се смета дека е најслична на онаа која се наоѓа на површината на Марс, била ставена во херметички затворен контејнер врз кој со LED осветлување се симулирала радијацијата на планетата. Биле вградени контроли за нагодување на температурата која ги симулирала дневните и ноќните циклуси на Марс, како и на притисокот на воздухот и нивоата на кислород и јаглерод диоксид.
Месец дена откога првиот плод бил засаден првичните резултати биле позитивни, бидејќи компирите го толерирале абиотскиот стрес и успеале да создадат плодови во специфичната почва.