Едно од прашањата кое човештвото постојано си го поставува е дали сме сами во универзумот. Научниците имаат направено безброј студии во обид да дадат одговор, и некои од нив велат дека тој е негативен, а некои, како скорешната студија од Беркли универзитетот во Калифорнија, дека е позитивен.
Истражувачите од Беркли анализирале скенови од 5600 блиски ѕвезди од Млечниот Пат во потрага по знаци од ласерски зраци во повеќето видливи бранови должини, кои биле направени од Кек телескопот во Хаваи помеѓу 2004-та и 2016-та.
Истражените ѕвезди се претпоставува дека се „домаќини“ на околу 2000 планети слични на Земјата во големина и температура, на кои теоретски би можеле да се развијат и опстојат вонземски форми на живот. За жал, дури и доколку тоа да се имало случено, ниедна од тие форми немаат пратено сигнали од оптички ласери кон нас.
Се разбира, недостатокот на докази не го негира постоењето на вонземски живот – можно е да таквите цивилизации сè уште не се доволно напредни за да користат ласери, или пак доколку ги имаат, не ги користат за интеракција со други светови.
Исто така, бројката во студијата претставува екстремно малечок дел од нашата галаксија. Колку за споредба, во неа има околу 300 билиони ѕвезди, од кои скоро 9 билиони имаат планети слични на Земјата кои орбитираат околу нив.
Истражувачите велат дека поголема студија на меѓуѕвездени ласерски сигнали ќе биде изведена од Breakthrough Listen Initiative, најголемиот научен истражувачки програм чија цел е да пронајде доказ за постоење на вонземски цивилизации.
10 годишната студија ќе истражува 1 милион најблиски до нас ѕвезди од Млечниот пат, вклучувајќи ги и оние од типот кафени џуџиња – кои не биле вклучени во студијата од Беркли.