Минатиот викенд, Елон Маск, основачот и извршниот директор на SpaceX вети дека ќе објави фотографии од вселенското одело кое неговата компанија го развива за NASA.
Тој сега откри една од овие фотографии на неговиот Инстаграм профил и најави дека деновиве ќе следат повеќе. За првпат најавен во 2015-та, на SpaceX им требаат скоро 2 години да го претстават дизајнот.
Маск вели дека оделото на фотографијата не е модел туку е вистинско и функционално, во споредба со она кое тој го носел за потребите на фотосесијата на Vogue пред 2 години. Како што се гледа, вистинското одело е претежно бело, а не сиво како она од Vogue.
Маск признава дека било тешко да се пронајде баланс помеѓу естетиката и функцијата, но според она што можеме да го видиме тоа му успеало – дури, оделото потсетува на некои кои ги носат војниците од видео играта Halo.
Во поглед на функциите, Маск вели дека оделото веќе ги поминало тестовите за притисок со двоен вакуум, како и оние за мобилноста и безбедноста при слетување во океан.
SpaceX сакаат ова вселенско одело да биде спремно за планираната прва мисија со човечки екипаж закажана за 2018-та, кога двајца патници треба да полетаат на една обиколка околу Mесечината, а истото се очекува да се користи и за SpaceX мисиите под програмата за комерцијални летови со екипаж на NASA.