Во септември, Елон Маск ги објави неговите планови во врска со Марс, според кои неговата компанија SpaceX ќе испрати барем два товарни лета без човечки екипаж до 2022, со мисија со екипаж во 2024.
Порано месецов, тој на Twitter објави дека товарот на инаугуративното патување кон Марс ќе биде неговиот оригинален Tesla Roadster, а сега и објави фотографии кои сведочат дека тоа навистина треба да се случи. Иако многумина сметаа (и сè уште сметаат) дека се работи за некаква шега.
На неколкуте фотографии објавени на неговиот Инстаграм профил се гледа возилото во вишна-црвена боја поставено на рампа во Falcon Heavy ракетата.
Како што Елон објаснува во неговиот пост, товарот во тест летовите на новите ракети обично се состои од бетонски или челични блокови за да се симулира масата која ракетите ќе ја носат за време на летот, но во случај на првиот лет на Falcon Heavy ракетата, тоа му се чинело екстремно досадно.
Затоа, решил товарот да биде новиот Tesla Roadster, во кој ќе свири песната Space Oddity на Дејвид Боуви.
Голем дел од порталите, но и експертите од научниот свет сè уште не се сигурни дали се работи за добро осмислена шега на Елон или за вистина, па велат дека ќе поверуваат дури откога ќе ја видат ракетата да полета со Tesla Roadster-от во неа.