Од Кејп Канаверал во Флорида успешно беше лансирана ракетата Falcon Heavy на SpaceX, носејќи го Tesla Roadster личниот автомобил на Елон Маск како товар, во кој свири песната „Space Oddity” на Дејвид Боуви.
Falcon Heavy сега ја носи титулата на најмоќната ракета во светот, а лансирањето го одбележува првиот пат кога волку големо возило е испратено во вселената од комерцијална компанија.
Ракетата има 27 мотори со чија помош може да подигне околу 63 500 килограми товар во ниската земјина орбита, двапати повеќе отколку било која друга ракета. Ова моќно летало би можело да отвори мноштво нови бизнис можности за SpaceX – лансирање на тешки сателити потребни за националната безбедност или пак гoлеми модули или луѓе.
Првата мисија има намена да се види дали Falcon Heavy може да го прави она за кое што е дизајниран, а тоа е ставање на објекти во орбита, поради што и товарот е токму возилото на Елон.
Горниот дел од ракетата (кој што го носи возилото) се одвоил од останатиот, а по финалното согорување на моторите за потисок тој требало да биде поставен на траекторија која ќе го донесе близу орбитата на Марс.
Но и покрај тоа што согорувањето било успешно, траекторијата на која е сега Tesla-та ќе ја однесе подалеку – во астероидниот појас близу орбитата на џуџестата планета Церес.
Сега кога е веќе еднаш успешно лансирана, ракетата ќе изврши уште неколку мисии оваа година. Во првата половина на 2018-та ќе го лансира големиот комуникациски сателит на Саудиска Арабија наречен Arabsat 6A, потоа во јуни ќе однесе товар на американската авијација во вселената, а потоа ќе треба да лансира уште два дополнителни комуникациски сателити за Inmarsat и Viasat.