Брзите радио сигнали (FRB, Fast radio bursts) се блесоци од радио сигнали кои се шират низ Вселената, кои во себе содржат количина на енергија која Сонцето ја создава во период од скоро еден век, а траат неколку милисекунди.
Првите такви сигнали биле откриени пред нешто повеќе од една декада, а научниците сè уште не знаат што точно ги предизвикува.
Претходно се сметало дека овие мистериозни блесоци потекнуваат од галаксии милијарди светлосни години далеку од Земјата, меѓутоа австралиски истражувачи пред некое време ја барале галаксијата од која потекнувал еден од таквите зраци (FRB 171020), за да откријат дека тој потекнувал од извор релативно блиску до Земјата.
Во новото истражување водено од австралискиот државен научен институт CSIRO, се вели дека потеклото на радио сигналот можеби е галаксијата ESO 601-G036, која се наоѓа на 120 милиони светлосни години од Земјата.
Оваа галаксија има слични карактеристики како уште една галаксија од која потекнуваат полно други радио бранови, но која се наоѓа на 3 милијарди светлосни години од нас.
Како и за секој друг вселенски феномен кој не е целосно разбран од научниот свет и за овој многумина веруваат дека се работи за пораки од вонземјани или еден вид на „светилници“ за наведување на меѓуѕвездени вонземски бродови. Иако и сето тоа не е неверојатно (иако не постојат никакви докази дека е), едно од објаснувањата е дека се работи за сигнали чие потекло се судари помеѓу два многу густи објекти, како што е спојување на црни дупки или неутронски ѕвезди или пак од исклучително енергетска супернова.