Научниците откриле нов доказ за постоење на огромна црна дупка во центарот на нашата галаксија, со набљудување на материјал кој се приближувал кон хоризонтот на настани (event horizon) поточно границата на црната дупка која ја одделува од останатиот дел од универзумот и каде ништо, па дури ни светлината, не може да ја избегне нејзината гравитација.
Интернационален тим астрономи користеле инструмент на ESO VLT телескоп во Чиле за да ја набљудуваат супермасивната црна дупка наречена Sagittarius A*.
Инструментот е наречен GRAVITY и ги комбинира светлата од 4-те VLT телескопи за да креира „супер-телескоп“ со дијаметар од 130 метри.
Со негова помош, тимот можел да набљудува светкања на инфрацрвена радијација кои доаѓале од Sagittarius A*, за кои се смета дека потекнуваат од врел гас кој орбитира близу хоризонтот на настани.
Овој материјал се претпоставува дека се движи со огромна брзина, а најблиската точка до која може да се доближи до црната дупка без да го премине хоризонтот е позната како „најдлабоката стабилна орбита“ и токму од таму потекнуваат детектираните светкања.
За гасот се верува дека е поврзан со ѕвезда наречена Ѕ2 која според Ајнштајновата теорија за релативност би ги предизвикала светкањата кога би се приближила до црната дупка на секои 16 години.
Постои и проект со кој научниците ќе се обидат да ја сликаат Sagittarius A*, наречен Event Horizon Telescope (EHT), со што би се направила првата слика во светот на една црна дупка.