Астрономите детектирале знаци кои покажуваат дека околу Бернардовата ѕвезда најверојатно орбитира планета.
Оваа ѕвезда е од видот црвено џуџе и постои уште пред нашиот Сончев Систем да биде оформен. Се наоѓа на 6 светлосни години од нас и е една од најблиските ѕвезди до нашето Сонце. Само 3 други ѕвезди од системот Алфа Кентаур се поблиску.
Црвените џуџиња се многу помалечки и постудени од нашето Сонце и имаат силна магнетна активност, но Бернардовата ѕвезда е една од најтивките од овој вид кој ни се познати.
По неколку годишно интензивно набљудување на ѕвездата, биле анализирани мерења од последните 2 декади правени со 7 различни спектрометри, при што биле откриени аномалии кои што по бројни симулации било заклучено дека се предизвикани од планета, со 99.2% сигурност.
Таа планета би била потенцијална супер-Земја – со маса поголема од Земјата, но помала од онаа на ледените џинови како Уран. Сепак, повеќе детали околу неа не се знаат.
Астрономите предвидуваат дека таа најверојатно е карпеста, тешка 4 земјини маси и скоро сигурно е замрзната (поради нејзината потенцијална местоположба во однос на ѕвездата) со температури на површината од околу -170°C
Следната генерација на опсерваторски инструменти кои треба да почне да функционираат во 2020-тите можеби ќе биде способна да сними директни слики од овие егзопланети релативно блиску до Земјата, што ќе ни помогне повеќе да научиме во врска со нив.