InSight сондата на NASA е на Марс околу една недела, а веќе ни испраќа слики од рамнината Elysium Planitia близу екваторот.
Истовремено и Curiosity, ветеранскиот ровер на црвената планета кој таму е од 2012-та, испратил фасцинантна нова фотографија снимена на 26 ноември, на која се гледа необичен светкав објект.
Научниците сметаат дека истиот не е знак на никаков вонземски живот и преку Curiosity ќе се обидат да земат примерок од него за анализирање.
Тие веруваат дека се работи за метеорит (поради тоа што е светкав), но бидејќи изгледот може да прелаже, потребна ќе биде хемиска анализа за да му се потврди потеклото.
Curiosity тоа го прави со помош на ChemCam инструментот, со кој се испукува ласер кон објектот што резултира со испарување на материјал кој потоа се анализира. Оваа техника била користена на примерок откриен во ноември 2016-та кога била откриен неговиот никел-железен состав.
Метеоритите не се ништо ново на Марс – поради неговиот атмосферски притисок кој е 1% од земјиниот, на метеоритите им е полесно да стигнат до површината недопрени.
Нивната природа исто така се разликува од оние пронајдени на Земјата – само 4.4% од метеоритите на Земјата се железни, а повеќето се карпести. На Марс, пак, доминираат железните метеорити од малкуте кои што се пронајдени. Не е познато зошто е тоа така, но една од причините е што железните метеорити се поотпорни на силните процеси на ерозија на Марс.