NASA и ESA (Европската вселенска агенција) објавија нова слика направена со телескопот Хабл на галаксијата Триангулум, еден од нашите најблиски галактички соседи.
Целата слика има 665 милиони пиксели и е компонирана од 54 различни фотографии на кои се прикажани помеѓу 10 и 15 милиони од 40 милијарди ѕвезди кои ги има оваа галаксија.
Големи региони од галаксијата се полни со гас и облаци од вселенска прашина кои содржат материјали од кои се раѓаат нови ѕвезди. Претходни истражувања од тимот на Хабл откриле дека нови ѕвезди со големина на нашето Сонце се формираат во овие облаци еднаш на секои две години.
Ѕвездите живеат долго време, често и милијарди години. Многу од нив, кои можеме да ги набљудуваме се прилично стари – така да оваа прилика да се набљудуваат „ѕвездени новороденчиња“ е исклучително корисна за астрономите и астрофизичарите.
Како што научниците ги анализираат собраните податоци, така ќе имаме прилика да научиме многу повеќе во врска со настанувањето на ѕвездите како нашето Сонце.