NASA во 2015-та го објави натпреварот за најдобро 3D принтано живеалиште кое би се користело на Марс, во кој тимови низ САД беа предизвикани да креираат анимација, да го докажат структурниот интегритет и да конструираат модел на живеалиште кое еден ден би можело да се користи на површината на Месечината, па дури и на Марс.
Сега се прогласени најдобрите 3 проекти, а тимовите кои ги имаат изработено ќе ја поделат наградата од $100 000.
Првото место го доби тимот SEArch+/Apis Cor за нивниот дизајн на вертикално живеалиште кое континуирано може да се зајакнува со дополнително 3D принтање и во кое светлината навлегува низ кружните отвори на надворешниот дел од конструкцијата.
Второто место е за Team Zopherus за дизајнот кој би можел да се испринта со т.н „3D ровинг принтер“, односно подвижен принтер кој по создавање на структурата би се преместил на следната локација за принтање.
Третото место припадна на Team Mars Incubator, за нивното живеалиште направено од шестоаголни 3D принтани парчиња од полиетилен, влакна и локален реголит.