Постојат многу предизвици кои човештвото треба да ги надмине за да се оди подалеку во Вселената, а еден од нив е недостатокот на кислородот.
Сега, истражувачи од Caltech создале нов уред кој еден ден би можел да биде клуч за решението на овој проблем – тие развиле метода за екстрахирање на кислород од јаглерод диоксид, инспирирана од кометите и сметаат дека истата може да се користи во идните интерпланетарни мисии, како и за редуцирање на стакленичките гасови во нашата атмосфера.
На хемиските реакции им е потребна енергија, обично во форма на топлина, а хемиска реакција може да се започне и со кинетичка енергија. Истражувачите знаат дека водените молекули ослободени од кометите можат да се забрзуваат со соларниот ветер и испуштаат кислород кога повторно се враќаат на површината на кометата.
Бидејќи кометите исто така емитираат јаглерод диоксид, тимот истражувачи сакал да провери дали истиот процес се случува и со CO2. Тие креирале експеримент каде забрзувале молекули на CO2 и ги терале да се судираат со површина на златна фолија. Златото е инертен елемент, па така истражувачите биле сигурни дека доколку се формира кислород, тоа ќе биде исклучиво поради хемиската реакција.
Уредот функционирал и истражувачите откриле нов начин за генерирање кислород – нешто што ќе биде витално за иднината на долгите вселенски патувања, како на пример кон Марс.
Тој всушност функционира како мини забрзувач на честички. Молекулот на јаглерод диоксид е јонизиран, со отстранет електрон, па така истиот може да се забрза со електрично поле, а судар би го скршил ослободувајќи кислород. Моментално, уредот не е претерано ефикасен – на 100 забрзани CO2 молекули, се добиваат еден или два молекули кислород. Сепак, тимот се надева дека ќе пронајде начин да ја подобри неговата ефикасност.