NASA планира да испрати „Атомски часовник за Длабоката Вселена“ во Вселената, каде ќе функционира како еден вид космички GPS систем кој на вселенските летала ќе им помага да си ја знаат локацијата.
Самиот систем е со големина на тостер и ќе биде дел од товарот на SpaceX Heavy Falcon ракетата чие лансирање е закажано за 22 јуни од вселенскиот центар Кенеди.
Тој ќе мери колку време е потребно за сигнал да се движи од една до друга точка во Вселената и со помош на тие податоци да го информира вселенското летало за неговата точна локација.
Овој проект е првиот атомски часовник од овој вид кој ќе лета подалеку од земјината орбита, во која ќе помине една година пред да се насочи во длабоката Вселена.
Според изјавата на NASA, часовник кој е понапред/поназад дури и за една секунда би значел разлика помеѓу слетување на Марс и промашување на планетата за неколку километри. Во тестовите на Земјата, овој атомски часовник се докажат 50 пати постабилен отколку атомските часовници на GPS сателитите, а доколку со оваа мисија се покаже толку стабилен и во Вселената, тој ќе биде еден од најпрецизните часовници во Универзумот.