Скоро два месеци по нејзиното откритие, астрономите продолжуваат да ги отклучуваат мистериите на нашиот втор посетител кој потекнува од меѓуѕвездениот простор, кометата 2l/Borisov. Со последната опсервација била откриена вода на овој фасцинантен објект.
Преку опсервациите на кометата во висока резолуција биле детектирани емисии на кислород (класичен показател за присуство на вода) во гасот кој се исфрлал од кометата, а било проценето дека таа исфрла околу 11 000 милијарди тони вода секоја секунда.
Дури и доколку Borisov е поактивна комета во споредба со оние кои потекнуваат од нашиот ѕвезден систем, таа не се разликува премногу од нив – што сугерира дека механизмите за формирање на комети се слични преку разните ѕвездени системи.
Кометата била откриена на 30-ти август од страна на аматерскиот астроном Генадиј Борисов во опсерваторијата MARGO во Кримеа. Именувана според него, таа го добила префиксот 2l што значи дека е втор меѓуѕвезден објект откриен во Сончевиот Систем, по астероидот Оумуамуа во 2017-та.
Нејзиното јадро има дијаметар од околу 1 километар, се движи со брзина од 150 000 км/ч., а во однос на орбиталната рамнина на нашата планета нејзината траекторија е под агол од 40 степени.
Кометата Borisov се движи кон внатрешноста на Сончевиот систем, а најблиску до Сонцето ќе биде на 8-ми декември, кога ќе му се приближи на околу 300 милиони километри – што е скоро двојно повеќе од оддалеченоста помеѓу Земјата и Сонцето.