Сè уште учиме за потенцијалните ефекти кои долготрајниот престој во Вселената може да ги предизвика на човечкото тело. Сега е идентификувана нова закана која би можела да ги изложи на ризик животите на астронаутите на долгите патувања низ космосот.
Проблемот е во внатрешната вратна вена, голем крвен сад кој се протега од вратот до мозокот. Студија врз 11 астронаути кои поминале време на Интернационалната вселенска станица (ISS) покажала дека 6 од нив развиле стагнантен или обратен крвоток во оваа вена, за период од само 50 дена.
Еден член на екипажот развил тромбоза како резултат на престојот во Вселената.
Според тимот кој стои зад овие нови откритија, овој проблем мора да биде истражен пред да почнеме да испраќаме астронаути на долг пат низ Вселената, каков што би бил оној до Марс.
Тука долу на Земјата, гравитацијата е виновникот за тоа што крвта ни се движи од главата кон остатокот на телото, што е една од причините што се чувствуваме чудно доколку, на пример, стоиме на раце подолго време.
Во микрогравитациското опкружување на ISS, проблемите со крвотокот не се единствените здравствени ризици за кои треба да се загрижиме бидејќи долготрајниот престој во бестежински простор резултира со подуеност на лицето, намален волумен на нозете и на плазмата.
Ќе треба да се направат повеќе истражувања на оваа тема за да се увиди за колку голем проблем навистина се работи и како може да го решиме за идните вселенски патувања.
Веќе ни е познато дека времето поминато во Вселената може да ја намали густината на коските, промени составот на бактериите во стомакот, како и да предизвика притисок на мозокот.