Лендерот Филеа, кој го исполни историското слетување на кометата, моментално е стабилен по одредени проблеми за време на прикачување на кометата и праќа слики кон Земјата. Сепак, пред научниците се нови грижи, бидејќи тој слетал еден километар подалеку од планираната мета и се наоѓа во сенка.
Научниците сега стравуваат дека Филеа нема да има доволно светлост за да ги наполни своите батерии, а судејќи по моменталните податоци, роботот прима само час и половина сончева светлост при секоја ротација на кометата која трае 12 часа, а според прописите би требало да бидат вкупно 7 часови. Ова нема да биде доволно за да се изведи целата планирана операција. Тимот мора прво во целост да го одреди местото каде што се наоѓа на површината на кометата и со што е опкружен.
- Се наоѓаме на работ на кратерот, што би можело да ја објасни оваа бизарна ориентација која ја видовме. Одредувањето на ориентацијата и локацијата е тешка задача и не можеме да дадеме повеќе информации од оние кои веќе станаа достапни за јавноста, изјави Стефан Уламец, главен на тимот задолжен за Филеа.
Овој тим продолжува да ги прима податоците кои ги праќа лендерот благодарение на неколкуте инструменти кои му беа вградени. Моментално е стабилен, но постојат одредени опасности со оглед на тоа дека не е правилно зацврстен за површината. И сега, поради оваа ситуација, научниците се скептични за понатамошната мисија бидејќи Филае лесно може да биде исфрлен од кометата. Стефан е загрижен и за бушењето на кометата поради земање на примероци, бидејќи тоа би можело да влијае врз стабилноста на лендерот.