Деновиве се појави нова снимка од експлозијата на ракетата на НАСА – Антарес, која даде нов поглед на несреќата која се случи на 28 октомври. За потсетување, ракетата експлодираше само неколку секунди по лансирањето и падна назад на Земјата, а требаше да носи опрема до Меѓународната вселенска станица за астронаутите кои моментално се на мисии во вселената. Во несреќата е уништена опрема со вредност поголема од 200 милиони долари.
Ова видео всушност е компилација од снимки од повеќе камери на далечинско управување, кои се поставени близу местото за лансирање. Иако камерите биле многу блиску до ракетата, снимките преживеале.
- Лансирањето изгледаше беспрекорно. Потоа одненадеж чадот се претвори во жолт и посветол од нормално. Тогаш знаевме дека работите ќе тргнат по лошо. Ракетата изгледаше како да виси во воздухот и наеднаш почна да гори, како да гледате забавена железничка несреќа, изјави Елиот Северн, фотоновинар кој го следеше лансирањето.