Британската компанија Cat Phones, специјализирана за издржливи телефони и заштитни куќишта за Android и iPhone уреди, лансираше нов телефон кој го нарече Cat B30 Rugged Feature Phone, а кој е наменет за сите оние на кои им треба издржлив теренец кој нема да престане со работа и во најсуровите услови.
Треба да се нагласи дека се работи за “глупав“ телефон кој овозможува телефонирање и испраќање на пораки, долго траење на батеријата и работа со две SIM картички, фотографирање на слики со мала резолуција, слушање на FM радио и MP3 песни, 3G поврзаност, но не и користење на напредни апликации.
Секако јасно е дека ваквите “оклопници“ имаат своја специфична публика, и дека не треба да се потценува нивниот удел на пазарот, бидејќи во текот на 2014 година, се продадени околу 650 милиони “глупави“ телефони, а повеќето од нив завршиле во рацете на алпинистите, планинарите, екстремните спортисти и работниците од разни профили чие работно место се наоѓа на отворено.
Исто така треба да се додаде дека телефонот е дизајниран за да може без никакви проблеми да работи на температура помеѓу -25 и 55 степени Целзиусови. Цената на уредот во online продавницата на компанијата изнесува 99 фунти.