Исклучително мала GoPro камера пристигнува со се што се очекува од неа, а како дополнително изненадување е тоа што таа е водоотпорна. Видеото го снима во Full HD резолуција со 60 fps.
Hero4 Session е најмалата камера која GoPro досега ја претстави, но ова е прва камера со значително поинаков дизајн од првиот модел кој го исфрлија во далечната 2007 година. Нејзиниот развој траеше три години.
Освен што е најмала и најлесна, оваа камера е голем чекор за GoPro бидејќи е прва за која не треба дополнително куќиште за да преживее во тешки услови или во вода до 10 метри длабочина.
Кога се работи за помала камера која чини 400 долари, корисниците ќе треба да бидат подготвени и за некои отстапки. Па така малата камера е ограничена на 1080p60 видео, но веројатно ќе преживеете без 4К поддршка. Недостиг е што и батеријата не е заменлива и нуди 1030 mAh.
Користењето е прилично едноставно. Краток притисок на прекинувачот ја вклучува камерата и автоматски го стартува снимањето на видео, додека другиот притисок ја стартува камерата да снима фотографии.
Второто притискање го чува видеото или фотографијата и ја гаси камерата. Фотографиите ги снима во резолуција од 8 мегапиксели. Малиот LCD екран на камерата ви го покажува режимот на работа и состојбата на батеријата.