Ако не сте од оние кои летниот годишен одмор на море или езеро го користат исклучиво за излежување на плажа и забави, туку настојувате да го збогатите со активности како пливање, веројатно ќе ви се допаднат OnCourse Goggles паметните очила за пливање кои во себе поседуваат навигациски систем за одржување на насока.
Без разлика дали пливате во отворени води исклучиво рекреационо или се занимавате со посериозни активности сигурно повеќе пати сте имале проблем со држењето на насоката па непотребно сте оделе цик-цак или трошеле сила на често подигнување на глава во потрага по ориентација.
Паметните очила OnCourse Goggles, кои неодамна се најдоа во системот на crowdfunding на Kickstarter, би требало значително да ви ја подобрат ориентацијата во пливањето.
Кога очилата ќе ги ставите на глава, насочете ги кон целта, и притиснете го копчето за активација, тие ќе ве наведуваат со помош на LED лампички во бои.
Во очилата се наоѓа високо прецизен електронски компас, акцелометар, микропроцесор и батерија за полнење, а системот работи со помош на посебен софтвер кој ја анализира насоката на вашето пливање.
Кога се наоѓате на курсот ќе ви светат две зелени LED лампички, ако малку се тргнете од патот едната ќе се изгаси, а ако сосема се тргнете од патеката ќе се вклучи црвено светло на едната страна за да ви даде знак дека тоа не е насоката кон која треба да пливате.
Доколку сметате дека овој гаџет е токму она што ви е потребно, можете да го нарачате од Kickstarter за 149 долари, а испораките би требале да започнат оваа есен.