Доколку сакате да бидете меѓу првите корисници кои во првиот квартал на следната година на својата глава ќе го носат headset-от за проширена реалност на Microsoft, ќе треба да издвоите голема сума на пари.
Тимот од Редмонд на својата страна објави дека започна да прима преднарачки за HoloLens Development Edition Headset, па за своите очила со холограми ќе треба да платите 3000 долари.
Ако ова ви се чини премногу скапо, може ќе ве утеши фактот дека се работи за модел наменет за дивелопери, па со него ќе добиете и SDK кој ќе ви овозможи сами да изработувате апликации и други содржини, кои еден ден ќе можете да ги продавате кога ќе се појави пазарниот модел.
Во соопштението на компанијата се наведува дека HoloLens ќе ви овозможи да го погледнете светот на Minecraft и воопшто гејмингот со поинакви очи, со оглед на тоа дека мешањето на реалноста и виртуелниот свет, ќе ви овозможат секоја површина да стане портал.
Освен тоа, HoloLens ќе ви понуди можност за управување со гестикулации и глас, и ќе можете да го користите за вистинско „холограмско компјутерски искуство“.
Вистина е дека сето тоа звучи интересно и примамливо, но мора да признаеме дека е разочарувачка цената за прототип кој се уште не се знае по која цена ќе им се продава на крајните корисници.