Технологијата која може да се носи (wearable tech) зема сè поголем замав и доаѓа во разни форми – од компјутерски чипови вградени во очила, контактни леќи, па до „лепенки“ кои се ставаат врз кожата.
Сега на ред е и облеката која ја носиме – дизајнерката Laura Devendorf во колаборација со научен тим од UC Berkeley развиле ткаенина која може самата да ја менува бојата како реакција на електрични полнежи, поплочувајќи го патот за изработка на „паметни“ ткаенини и дисплеи кои што ќе може да се носат/облекуваат.
Технологијата е наречена Ebb, a нејзиното развивање е дел од Project Jacquard на Google, кој има за цел да го развива потенцијалот за неприметно интегрирање на електроника во облеката.
Конецот кој се користи е изработен со премачкување на кондуктивните влакна со термохромични пигменти (кои менуваат боја при промена на температура), кои тоа го прават бавно и кога ќе се вметнат во ткаенината, креираат смирувачки „анимации“ со бојата која што се „движи“ низ облеката. Името Ebb инаку во превод значи „одлив“ и ја рефлектира бавноста со која се одвива процесот.
Ова значи дека ваквите ткаенини (за среќа) нема да можат да се користат за креирање на нападни и „трепкави“ реклами врз облеката, барем не во догледно време.
Добрата страна на оваа технологија е што се надеваме во блиска иднина нема да имаме потреба од купување на исти парчиња облека во различна боја, бидејќи неа ќе можеме да ја менуваме по потреба.