Пред една недела, се појави играта Pokémon Go, која направи вистински бум во светот и кај нас. Програмерите во Niantic буквално се фаќаа за глава поради огромниот број на симнувања на мобилната игра. Pokémon Go ја надмина популарноста на Candy Crash, а до крајот на неделата се очекува и да ги надмине корисниците и на Snapchat. Од Google пак објавуваат дека корисниците многу повеќе го пребаруваат Pokémon Go, отколку порнографски содржини!
Во играта бркате различни Покемони и тоа во реален свет. Откако ќе уловите еден Покемон, тој станува дел од вашата колекција, а потоа можете да ги тренирате или да се борите со другите играчи. За да уловите повеќе Покемони треба да се движете во реалниот свет бидејќи играта ја користи мапата на градот во кој се наоѓате. Милиони корисници се фалат дека играта е позитивна затоа што премногу се движат во природа.
Сепак, поради оваа игра се случија и неколку несреќи. За да го уловите Покемонот, мора да гледате во вашиот мобилен телефон, а имало случаи каде што се предизвикувале сообраќајни несреќи. Забележана е и бизарна ситуација кога еден тинејџер нашол мртво тело додека го барал Покемон во шума. Дури и крадците ја искористуваат играта. Ги наведуваат луѓето во потрага по ретки Покемони на осамени места и таму ги ограбуваат.
И додека светот се занимава, програмерите на Niantic тријат раце. Објавија дека наскоро ќе воведат и спонзорирани локации, што ќе им донесат поголема заработка. За само неколку денови вредноста им пораснала за 9 милијарди долари!