Седум целосно автономни компјутери ќе водат историска „битка“ во Лас Вегас наредниот месец, кога ќе пробаат меѓусебно да се хакираат без никаква надворешна човечка помош.
Финалето на DARPA’s Cyber Grand Challenge (CGC) ќе се одржи на 4-ти август (помеѓу двете најголеми хакерски конференции – Blackhat USA и DEFCON) и најверојатно ќе докаже дека машините можат да ги победат и најдобрите човечки хакери.
Mike Walker (програмскиот менаџер на CGC) на прес конференција објаснил дека обично грешките во софтверите знаат да поминат незабележани и по 312 дена, за кое време често се експлоатирани од хакерите. Откога човекот ќе ги забележи, потоа е потребно истите да се разберат, поправат, и објават на пошироката јавност.
CGC цели кон тоа овој процес комплетно да се револуционизира, така што наместо да се чека скоро година дена за пронаоѓање на грешки, истите автоматски да се „средуваат“ за неколку минути, па и секунди.
На седумте тимови финалисти им биле дадени компјутери конструирани од DARPA и нивна задача била да ги испрограмираат да се способни да ги препознаат и разберат грешките во новите софтвери и да ги поправат. Откога предизвикот официјално ќе започне, тие нема да смеат да ги пипнат компјутерите, туку сè ќе зависи од нивната испрограмирана вештачка интелигенција. Тие ќе треба паралелно да си ги скенираат сопствените системи за проблеми (и да ги решат), но и останатите системи (чии грешки нема да можат да ги хакираат, туку ќе ги испраќаат преку порака на судиите кои ќе проверат дали истите можат да ја крахираат другата машина).
Победничкиот тим ќе си оди дома побогат за 2 милиони долари, додека другите позиции ќе добијат 1 милион (втората) и $750 000 (третата)