Истражувачи од Peking University и National Center for Nanoscience & Technology во Кина објавиле студија во која објаснуваат како успеале да ја манипулираат видливата светлина за да креираат „мета-холограм“. Накратко, тоа го постигнале со уредување на наноблокови да формираат пиксели на метаповршина.
Пикселите биле направени од три врсти на силиконски наноблокови со димензии кои кореспондираат со брановата должина на црвената, зелената и сината боја. Секој пиксел функционира како „мета-молекула“ – основна единица на метаповршината од која е составена целината на холограмот.
Секој наноблок манипулира со фазата на неговата соодветна боја секојпат кога црвен, зелен или син ласер ќе го погоди холограмот, а истражувачите пронашле начин да ја минимизираат интеракцијата помеѓу наноблоковите правејќи ги независни едни од други. Различни холографски слики се продуцирани во зависност од ориентацијата на наноблоковите, што им овозможува на истражувачите да манипулираат со фазата на светлината.
Овој пристап дозволува креирање на два различни типа на холограми – едниот е наречен ахроматски холограм и кај него целата слика е репродуцирана во една боја. Другиот е наречен високо дисперзивен холограм, каде што разни негови делови се составени од разни бои.
Овој нов тип на холограми може да се примени на различни начини – во апликации како 3D колор холограми, ахроматски леќи и други оптички уреди.