Некои од најголемите светски компании како Amazon и Google веќе ги имаат објавено нивните планови за вршење на комерцијални испораки со дронови, но лесно може да се случи да бидат претркани во тоа од познатиот ланец на пицерии Domino’s.
Domino’s Pizza Enterprises, меѓународната франшиза на овој познат бренд, во Окленд, Нов Зеланд направиле демонстрација на испорака на пица со дрон.
Според Don Meij, извршниот директор на Domino’s Group, компанијата отсекогаш сметала дека нема премногу смисла возила од 2 тона да испорачуваат порачки од 2 килограми, и изјавил дека користењето на дронови е наредна фаза на експанзијата на компанијата, која што ќе им овозможи да ги учат и адаптираат новите технологии за да си го подобрат бизнисот.
За потребите на оваа демонстрација, Domino’s ги здружиле силите со компанијата за испорака со дронови Flirtey, која доколку добие дозвола од регулаторната комисија, ќе почне да врши пробни испораки до домовите, подоцна оваа година.
Ваквиот тип на испорака ќе им овозможи на Domino’s да стигнат и до поруралните средини, како и до урбаните за многу пократко време отколку досега.
Инвестициите на компанијата во нови технологии се една од причините за нејзиниот скорашен успех, кога акциите на американскиот бренд достигнале врвни бројки – $151.10 по акција.