Досега конзументите имаа пристап до висококвалитетни содржини со VR (Виртуелна Реалност) преку уредите како Oculus Rift и HTC Vive, a нареден чекор во еволуцијата на VR се очекува да е технологијата за следење на погледот. Но, една група девелопери решила да тргне во сосема друга насока – да овозможи тактилен фидбек низ целото тело кога, на пример, виртуелниот ветер или објект ќе го допре ликот, преку нешто што го нарекуваат Skinterface ( името доаѓа од кожа (skin) + интерфејс)
Тимот од Лондонскиот Royal College of Art го креирал ова целосно одело кое е прекриено со мрежа од јазли составени од малечки активатори кои користат звук за да ги придвижуваат малечките магнети кои се наоѓаат под нив. Кога до јазлите ќе дојде одреден звук, тие испраќаат звучна форма која го вибрира магнетот – различни звуци генерираат различни вибрации.
Секој од овие јазли е со различна боја, овозможувајќи на 3D камерата да ги следи движењата на оделото. Како што ликот се движи низ виртуелниот простор, оделото ќе генерира различни сензации кои ќе можат да се почувствуваат низ целото тело. Наредниот чекор на тимот кој стои зад овој проект е да им овозможи на корисниците да ги чувствуваат виртуелните објекти во нивните раце.
Главната идеја зад Skinterface е дека кожата е човечкиот интерфејс со физичкиот свет, и дека како резултат на тоа, таа треба да биде главен интерфејс и во дигиталниот свет – во спротивно, луѓето се само набљудувачи низ виртуелен прозорец прицврстен на нивното лице (во форма на VR наочари или кацига).
Допирот е само една од главните цели кои треба да се остварат за придвижување на VR технологијата напред – компании как Emteq моментално работат на технологија која треба да ги внесе емоционалните интеракции во виртуелната реалност (во 4-тата VR генерација), додека пак Veeso работат на VR уред со технологија за следење на движењата на лицето.