Одредувањето на нечија емоција само врз основа на фацијалните експресии не е секогаш лесно, ниту пак добиените заклучоци се секогаш точни. Истражувачи од лабораторијата за компјутерска наука и вештачка интелигенција од MIT создале нова технологија со чија помош можат да се измерат и најсуптилните промени во ритамот на срцето и дишењето, што на истражувачите би им овозможило прецизно да детектираат дали личноста е среќна, тажна, возбудена, или лута.
Уредот е наречен EQ-Radio, и функционира така што испраќа безжични сигнали кон телото на личноста која што се „тестира“, кои потоа се рефлектираат и се враќаат назад во него. Потоа, неговите алгоритми за екстракција го делат сигналот (на пр., од чукањето на срцето) на индивидуални отчукувања, и ги анализираат малечките варијации во нивните интервали, со што се одредува степенот на возбуда и позитивно влијание. На овој начин може да се одреди и емоцијата на личноста – кога сигналот покажува слаб степен на возбуда и негативно влијание, уредот ја регистрира емоцијата како тажна, додека висок степен на возбуда и позитивно влијание се интерпретира како (позитивна) возбуда. Точноста на анализите изнесувала околу 87%.
EQ-Radio би бил корисен за употреба во забавните индустрии (како и оние кои се занимаваат со истражување на однесувањето на конзументите), а би имал и огромен потенцијал во дијагностиката и здравствената индустрија.