Во интервју за време на една конференција, Џеф Холден, шефот за продукти на компанијата Uber,изјави дека компанијата истражува начини како да овозможи услуга со кратки летови, користејќи летала кои полетуваат вертикално.
Холден рекол дека сака Uber да може да им нуди на своите муштерии разни начини за патување и дека летачката опција би можела да почне да функционира во наредната декада.
Процесот на вертикално полетување (кој го користат хеликоптерите), му овмозжува на пилотот лесно да ја контролира височината на летање. Од Uber сакаат да ја спојат оваа технологија, со онаа на дроновите. Тоа би вклучувало изработка на фиксни крилја и повеќе од еден ротор, со можност во иднина леталото да биде и комплетно автономно.
Оваа услуга би се користела за превоз на патници од кров на кров на зградите во големите градови, со што, покрај побрзото стигнување на саканата дестинација, значително би се растеретил сообраќајот долу на улиците.
Иако постојат проблеми кои ќе треба да се решат од типот на спречување на судари во воздухот, Холден е сигурен дека развојот на вакви летала бргу ќе напредува, според искуството на експерименталниот авион со вертикално полетување и слетување VTOL X-Plane на DARPA.