Од појавувањето на телевизорите со рамни екрани, ништо особено возбудливо не се случувало на тоа поле, освен подобрувањето на квалитетот на екраните и на резолуцијата која тие се способни да ја прикажуваат.
Но, што ако телевизорот може да е практично невидлив кога не се користи? ТV со ваков концепт Panasonic претставија на овогодинешниот CES – направен од транспарентен стаклен панел кој тоа му го овозможуваше кога не е вклучен.
Изминатата недела на CEATEC (Combined Exhibition of Advanced Technologies) саемот во Јапонија, Panasonic ја претстави унапредената верзија на овој телевизор, која дава далеку појасна и по осветлена слика од претходниот, благодарејќи на OLED дисплејот (кај претходниот тој беше LED).
Panasonic го опишуваат овој телевизор како „иднината на екраните“, а технологијата со која што е изработен сè уште се чува во тајност, во случај конкурентите да дојдат на слична идеја – иако некои претпоставуваат дека се работи за прецизно изработена тенка мрежа од диоди, вметната во стаклениот панел.
Како што се гледа на сликите, кога TV-то е исклучено, екранот е потполно транспарентен и може да се користи како врата од кабинет.
OLED технологијата бара и многу малку струја за да работи, што им овозможува на панелите да се волку тенки. Поради тоа, многу компании веќе размислуваат и за изработка на флексибилни OLED екрани кои ќе можат да се виткаат, па дури и да се „соберат“ во ролна која лесно ќе се транспортира.
За жал, и покрај (брзиот) прогрес помеѓу двете варијанти на овој транспарентен телевизор, од Panasonic велат дека тој нема да се појави на пазарот во наредните најмалку 3 години.