Дел од утринската рутина во поглед на доручекот за некои е двопек, за некои голема чинија корнфлекс со млеко, а за некои, пак палачинки. За овие последните, постои гаџет кој ќе ја разбие монотонијата на нивното приготвување и се вика PancakeBot.
PancakeBot е еден вид „3D принтер“ за палачинки кој се состои од BPA-free систем (значи без хемикалија во пластиката што е штетна за човекот) за ослободување на тестото во одредена форма, врз плотната на која палачинките ќе се печат и која лесно се отстранува за чистење.
Доаѓа со специјален софтвер на кој што ќе може да се нацрта било која форма во која што сакате да бидат „принтани“ палачинките, а понуден е и избор од неколку постоечки (астронаут, диносаурус, цвеќе и сл.). Уредот е компатибилен и со SD мемориски картички преку кои што можете да вчитате и други слики кои што сте ги одбрале.
Чини околу $300, но дефинитивно ќе ви го направи доручекот поинтересен, особено доколку го спремате за деца – со PancakeBot и тие самите ќе бидат вклучени во тоа.