Воената индустрија останува еден од главните двигатели на новата технологија, со новиот воен хардвер кој се развива секоја година, и војската која присвојува голем дел од технологијата наменета за „обичните“ консументи и ја вградува во своите системи (како шлемовите со интегрирана Microsoft Hololens технологија)
Велика Британија наредната година ќе почне со конструкција на технолошки најразвиениот воен брод наречен Type 26 Global Combat Ship, кој ќе биде направен во партнерство со BAE Systems, и ќе се гради во Шкотска.
За потребите на Кралската Морнарица се очекува да се испорачаат 8 вакви бродови (способни и за борба против подморници), во чиј програм за изработка развиен од инженери од BAE Systems и Министерството за одбрана на Велика Британија веќе се инвестирани 1.9 билиони фунти.
Type 26 ќе има акустично тивок бродски труп, модуларен дизајн кој ќе може да се надополнува, и отворени системи. Сето ова треба да ја осигура потребата кога ќе се појават нови технологии и системи, да можат лесно да се вклопат во дизајнот.
Бродот тежок 6900 тони ќе биде опремен со Artisan 3D радар, Sea Ceptor противвоздупни проектили, Sonar 2087, и топови со среден калибар. Дизајниран е за борба против подморници, воздушна одбрана, па дури и за асистенција при хуманитарни потреби. Се очекува неговата служба да започне во 2020-тите, и да трае до средината на овој век.