Научници од Универзитетот Кембриџ објавиле студија опишувајќи ја нивната литиум-сулфурна батерија, чија изработка била инспирирана од обвивката на човечкото тенко црево. Новата батерија е способна да складира 5 пати повеќе енергија од литиум-јонските батерии.
Типичната батерија функционира така што има позитивно набиени литиумски јони кои се движат низ катода (позитивна електрода), електролити, и анода (негативна електрода). Од кристалната структура на електродите зависи колку енергија може да се складира во една батерија, а бидејќи јаглеродните електроди на овие батерии можат да имаат по 6 литиумски јони, тоа значително го лимитира капацитетот на батериите.
Литиумот и сулфурот реагираат различно, преку мулти-електронски преносен механизам, што значи дека теоретски, сулфурот може да има многу поголем капацитет од литиум-јонот. Меѓутоа, кога литиумот и сулфурот реагираат помеѓу себе кога батеријата се празни, сулфурот се претвора во синџирести поли-сулфиди кои можат да навлезат во електролитите додека се полнат и празнат, што резултира со губиток на активниот материјал на батеријата.
Новиот дизајн на истражувачите од Кембриџ користи слој од нано-жици од цинк-оксид, што резултира со структура со иста форма како ресичките на човечкото тенко црево, која може да ги зароби поли-сулфидите. Ова ги задржува фрагментите електрохемиски достапни, што му дозволува на материјалот да биде повторно искористен.
Лимитацијата на овој тип на батерија е фактот што не може да се споредува со литиум-јонските во поглед на циклусите на полнење, бидејќи тие се значително помали а и времето за полнење е подолго. Меѓутоа, капацитетот би и бил поголем за околу 5 пати од сегашните батерии што од друга страна е многу голема придобивка.
Дизајнот сега засега е само доказ дека концептот функционира, а кога ќе се усоврши и ќе стане комерцијално достапна, литиум-сулфурната батерија ќе биде зачетник на новата генерација на батерии со голем капацитет.