Доколку живеете во малечок стан, единствено место каде што можете квалитетно да вежбате е теретана или евентуално некој јавен отворен простор наменет за тоа – меѓутоа не секој преферира така да вежба, од различни причини.
Но, тоа не е единствена пречка – често пати и недостатокот на време не дозволува посета на теретана и сл. локации, па така останува само варијантата „по дома“, која не секогаш е изводлива за сите вежби, поради ограничувањата во просторот.
Идеален гаџет за такви ситуации е безжичното јаже за скокање на VersionTech, кое не само што безжично води евиденција колку пати сте скокнале и колку калории сте „изгореле“, туку е безжично и во буквална смисла на зборот – воопшто и нема јаже преку кое што би прескокнувале.
Гаџетот се состои од две дршки со кратко јаже на едниот крај, кое на себе има прицврстено топка. Дршките ги вртите со истите движења како што би вртеле и „нормално“ јаже и прескокнувате преку „замисленото“, при што сензорите во топките ги бројат ротациите и го пресметуваат бројот на потрошените калории. На дршките се прикажува и времето поминато во вежбање, кое треба да е пократко од она потребно за кардиоваскуларни вежби од друг тип – на пример, 10 минути скокање со јаже троши калории како 30 минутно трчање. Го има во две бои – црна и розева, а чини скромни $20.
За да функционира, потребни му се 2xAAA батерии, кои со оглед на времетраењето на вежбите, можат да траат и со месеци.