Компанијата Tamron е најмногу позната по нивните објективи за разни камери, а најновата најава која доаѓа од нив вели дека работат на сосема нов сензор кој е многу почувствителен од човечкото око и кој е способен да опфати неверојатен дел од динамичкиот опсег.
Новиот сензор се развива во партнерство со Јапонската агенција за наука и технологија, и како што се гледа од приложената слика, способен е да фотографира во услови со неверојатно мала количина на светлина – нешто што било огромен предизвик во минатото.
За да ги постигнат овие резултати, Tamron ја искомбинирале нивната оптичка технологија со екстремно чувствителен сензор и моќен процесор за слики. Заедно овие три компоненти креирале камера која е способна да слика јасни слики во боја при осветлување од само 0.003 лукса – што во споредба одговара на сцена осветлена само од светлината на ѕвездите и ништо друго.
Оптиката развиена за овој систем користи технологија со ултра-ниска рефлексија, која помага да се редуцираат артифактите кои обично се јавуваат кај сензорите со голема чувствителност. CMOS сензорот кој системот го користи работи заедно со специјална технологија за редуцирање на „дигиталниот шум“ (така што сликите се чисти и не се дисторзирани), како и со технологија на осветлување која собира најмногу што може информации од сликата, додека го одржува динамичкиот опсег на максимум.
Нема информации кога оваа технологија ќе се појави на пазарот, со и кога тоа ќе се случи, таа најверојатно нема да биде наменета за конзумерските камери, туку за оние кои се користат во индустриски цели.