Марк Закерберг има создадено систем со вештачка интелигенција (AI) со кој ја контролира електрониката во неговиот дом, и кој му помага во работата. Проектот го нарекол Џарвис, според AI системот кој го користи Тони Старк/Ајрон Мен.
Системот, меѓу другото, му помага него и на жена му преку вклучување и исклучување на светлата и електронските уреди, кажувајќи им ја моменталната локација на нивното куче, или ги алармира доколку нивната ќерка е вознемирена во нејзината соба.
Во глобала, домашниот AI систем е екстензија на инфраструктурата на Facebook, со која што може да се контролираат само оние работи кои го имаат сигурносниот сертификат на Facebook – што на пример, некој фрижидер со способност да се конектира на интернет, го нема.
Еден од поинтересните аспекти на овој проект е како Закерберг бира да е во интеракција со Џарвис. Според неговите зборови, она што го изненадило во врска со комуникацијата со системот е што кога имал избор дали да зборува или да му испрати порака, тој најчесто одбирал испраќање на порака.
Истото се случувало и кога требало да одбере како Џарвис да комуницира со него – тој ги претпочитал пораките. Марк смета дека тоа е поради фактот што гласот го одзема моменталното внимание, додека пораките даваат многу повеќе контрола во однос на тоа кога можат да се прочитаат.
Марк е горд на достигнувањето што го постигнал годинава, и се согласува дека она што самиот го создал за 150 часа во слободното време преку цела година е ништо во споредба со она што врвните инженери од Facebook можат да го креираат во времето кое го имаат на располагање. Бидејќи Џарвис е тесно поврзан со неговиот дом, тој не планира да го објави неговиот код, но еден ден оваа технологија би можела да се искористи како основа за идни проекти.