Polaroid е име кое е синоним за инстант фотографии, а компанијата има успеано да направи релативно успешна транзиција во дигиталната ера.
По минатогодишниот Polaroid Snap Touch модел, оваа година тие на пазарот ќе исфрлат нов – Polaroid Pop инстант дигитална камера.
Оваа нова камера ќе биде модерно видување на класичната Polaroid instant print камера, што се поклопува со 80 годишниот јубилеј на компанијата кој е оваа година.
Polaroid Pop ќе ја користи ZINK Zero Ink Printing технологијата, што ќе им овозможува на корисниците автоматски да печатат колор фотографии на иконскиот формат од 3x4 инча, заедно со класичната Polaroid рамка која е еден вид на заштитен знак на компанијата. Финалниот резултат ќе биде фотографија со димензии од 3.5 x 4.25 инчи, а камерата ќе има 4 инчен тачскрин LCD преку кој ќе се има пристап до менито, и до опциите за уредување на сликите.
Polaroid Pop ќе има CMOS сензор од 20MP , стабилизација на сликата како и двоен LED флеш, што ќе гарантира висок квалитет на фотографиите. Камерата исто така ќе нуди и опција за снимање видео во Full HD формат, а сите слики и видеа ќе можат да се складираат на microSD картичка со максимален капацитет од 128GB.
Камерата ќе има и WiFi и Bluetooth конективност што ќе и овозможува поврзување со било кој мобилен уред, а на располагање ќе бидат 3 колор мода: колор, црно-бел и сепија.