Демонстрирајќи го потенцијалот на виртуелната реалност (VR) надвор од гејмингот, австралиската археолошка стартап компанија Lithodomos VR работи на креирање на археолошки веродостојни реконструкции од археолошкиот свет. Со цел нивната визија да ја претворат во реалност, тие успеале да соберат $680 000 инвестиции.
Под водство на Сајмон Јанг, Lithodomos VR соработува со тим археолози, 3D компјутерски моделери, како и со дистрибутери на дигитални содржини, со цел прецизно да ги рекреираат историските локации.
Комбинацијата на археологија и виртуелна реалност обезбедува искуство кое што може да се аплицира на разни дисциплини – оваа технологија претставува огромен потенцијал за музеите, кои би можеле да привлечат поголема и помлада публика, за владините институции кои сакаат да го промовираат туризмот, истовремено едуцирајќи ги луѓето за нивното културно наследство, како и за образовните институции каде што виртуелната реалност би се користела да се подобрат наставните методи, и студентите што повеќе да се ангажираат во наставата.
Компанијата веќе креирала VR реконструкција на Paris’ Arènes de Lutèce (амфитеатар од гало-романската епоха во Париз,Франција), кој посетителите преку VR очила (од дома, или на самата локација ) можат да го видат како изгледал во романскиот период. Во план се и креации на разни музејски инсталации.
Иако сите овие технолошко-археолошки искуства се релативно нови, многу скоро може VR технологијата да ја гледаме во музеите и школите, барем оние од развиениот свет.