Откако WikiLeaks објави документи со кои тврди дека CIA има тајна програма за хакирање, на сите им е и повеќе од јасно дека камерите и микрофоните во модерните направи, лесно може да станат алатка за прислушување и следење.
Според нив, CIA создала повеќе од 1000 вируси, тројанци и друг тип на штетен софтвер кој се инфилтрира во системите и потоа ги користи за шпионажа. Со оглед на тоа дека секој паметен телефон, таблет, лаптоп, телевизор, па дури и автомобил е поврзан на мрежата многумина се загрижени за својата приватност.
Сепак, пред да започнете со смислување на најразлични негативни сценарија, компјутерските експерти посочуваат неколку нешта.
Прво и најважно, е дека ваквите програми за набљудување, во суштина не се инструменти за масовен надзор.
- Она што не изненадува, а воедно и смирува е фактот што овие алатки се насочени кон точно определени луѓе или направи, со цел да го компромитираат софтверот во нив, вели Мет Блејз, експерт од Универзитетот во Пенсилванија.
Тоа значи дека освен ако не сте терористи или закана за државата, тешко дека ќе се најдете на листата на луѓе кои ќе бидат набљудувани. Сепак, доколку постои ваков начин за инфлитрирање во податоците, тогаш тој е закана за безбедносните системи на државите.
Денес речиси нема човек кој не користи некаква модерна направа. Технологијата е неразделив дел од секојдневието, кој носи многу придобивки, па токму затоа е мошне тешко да се најде соодветно и ефикасно решение за проблемот.
Експертите советуваат дека ако веќе сте загрижени за својата приватност и заштитата на податоците треба да ги преземете следните чекори.
Можеби наједноставниот начин за самозаштита е да внимавате како ги користите модерните направи и да ги исклучувате од мрежата кога не работите со нив, со цел да оневозможите онлајн преземање на податоците. Иако звучи познато, мошне е важно редовно да правите update на оперативните системи, а воедно и да не отворате сомнителни линкови.
Секогаш е добро да се инвестира и во квалитетна антивирусна програма, а воедно и да се воздржите од сите оние компромитирачки нешта кои што би можеле да ве вовлечат во проблем.