Група истражувачи од Сарланд универзитетот во Сарбрукен, Германија, работат на концепт на ултра-тенки „електронски тетоважи“ кои кожата ја претвораат во површина т.е „копчиња“ осетливи на допир.
Привремените електронски тетоважи се наречени SkinMarks и се развиени како дел од истражувачкиот проект за компјутерско-човечка интеракција на Сарланд универзитетот.
Технологијата се состои од принтање на жици и електроди на хартија за тетовирање, користејќи кондуктивно мастило. Тетоважите се потенки од дебелината на човечко влакно, траат неколку дена, а може да се префрлат на кожата со помош на вода.
Со помош на SkinMarks тетоважа залепена на прст, би можело, на пример, да се нагодува силината на звукот на смартфонот преку поминување со друг прст врз неа. Виткањето, пак, на „тетовираниот“ прст би го претворил слајдерот за звук во копче за плеј или пауза.
Дополнителна можност која SkinMarks тетоважите ја имаат во споредба со другите е-тетоважи е електролуминисценцијата – тие светат секогаш кога низ нив има проток на струја. Така, тетоважа во форма на одредена апликација би можела да засвети кога на апликацијата на смартфонот ќе стигне нотификација.
Водачите на овој проект сметаат дека ваквата технологија ќе биде на располагање за сите во наредните 10 години, и дека ништо чудно да влезете во некој салон за тетовирање во 2050-та година, и од него за 5 минути подоцна да излезете со iPhone 22 „истетовиран“ на вашата рака.