Franklin Robotics е компанија од Масачусетс чиј тим го вклучува изумителот на познатата роботска правосмукалка Roomba, која сега има лансирано Kickstarter кампања за нивниот најнов робот. Овој пат не се работи за робот кој чисти подови и теписи, туку за робот дизајниран да го уништува плевелот во вашата градина.
Наречен Tertill, овој округол робот кој тежи нешто над 1кг користи сензори за да го идентификува плевелот во градина во која има цвеќиња или зеленчуци/овошја. Откога ќе го пронајде, тој го сече со специјални струни кои што се вртат. За идентификување на плевелот Tertill не користи камери или вештачка интелигенција, туку евтини капацитивни сензори кои одредуваат дали билките кои ги допира се кратки или високи. Така, секое растение што е доволно кратко за да целото се наоѓа под роботот се смета за плевел, и ќе биде исечено. Но, што ако имате некои кратки билки кои не смеат да се сечат? Решението е во специјална јака која се става околу билките додека не пораснат, која го спречува Tertill да „интервенира“ таму.
Tertill е соларно напојуван, па така може да функционира секој ден без никакви проблеми.
Една од опциите која тимот кој стои зад овој проект размислува да ја додаде е еден вид на реакција предизвикана од сензор чувствителен на движење, во случај роботот да има потреба да избрка/исплаши разни штетници и глодари.
Сега засега неговата цена на Kickstarter е $199, а кога ќе се појави на пазарот во март 2018 се очекува да чини околу $300.