Тим истражувачи од Кралскиот институт за технологија во Мелбурн (RMIT) развиле боја која може да се користи да генерира чиста енергија. Бојата го комбинира титаниум оксидот кој веќе се користи во многу ѕидни бои со нова состојка – синтетички молибденум-сулфид, кој има функција слична на онаа на силика гелот во кесички кои се става во амбалажите на разни продукти за да ги заштити од апсорбирање на влага.
Овој материјал покрај влагата, ја апсорбира и соларната енергија и може да ја подели водата во водород и кислород, собирајќи го водородот за понатамошно користење во горивни ќелии или за напојување, на пример, на возило.
Иако не се очекува бојата да се појави на пазарот во наредните 5 години, се очекува крајниот продукт да биде евтин за производство. Бојата би била ефективна при разни климатски услови – од средини богати со влага до суви и топли кои се наоѓаат до големи водени површини, бидејќи во секоја област каде што има вода која испарува може да се произведе гориво.
Со оваа боја би можеле да се покриваат објекти кои инаку не добиваат доволно сончева светлина за да на нив би било исплатливо инсталирање на соларни панели, а би можела да се покрие секаква површина – на фасада, ограда, шупа и др.