Австралискиот стартап Lingmo International го претстави својот најнов продукт кој може да толкува 8 различни јазици во реално време, за чие функционирање се користени алгоритмите од IBM Watson технологијата за учење на машини.
Традиционално, орално конвертирање во реално време на еден јазик во друг се нарекува интерпретирање/толкување, додека терминот „преведување“ се користи за обработување на текст. Дени Меј, основачот на Lingmo, пак, го опишува овој продукт како „преведувач во реално време“.
Тој вели дека уредот е целосно независна преведувачка слушалка, под што подразбира дека нема потреба од поврзување со телефон или некој друг уред преку Bluetooth или WiFi.
Наречен TranslareOne2One, ги подржува англискиот (во US и UK варијанта), јапонскиот, францускиот, кинескиот, италијанскиот, шпанскиот, германскиот, и португалскиот јазик.
Инаку, Меј почнал да заработува како квалификуван водоинсталатер, по што влегол во индустријата со соларна енергија. Во тој период од животот, кога бил на службено патување во Кина, му бил украден пасошот и кога со локалниот полицаец пробал да зборува користејќи конкурентски уред за преведување, наместо „здраво, како сте?“ преводот бил „здраво, те сакам“.
За да се избегнат такви грешки, неговиот уред користи алгоритам кој го анализира зборувањето во блокови од по 30 секунди, а за чиј хардвер биле потребни 12 месеци да се изработи. Има и 3G конективност, што значи може да „учи“ кога е конектиран на интернет. Компанијата цели кон 85% точност при преводите, а уредот преведува цели фрази а не збор по збор.
TranslateOne2One уредот да ќе се појави на пазарот по цена од $179, а ќе постои и како апликација за смартфони.