Истражувачи од NVIDIA, универзитетот Аалто и MIT преставиле нова AI програма која ефективно може да го отстранува „зрнестиот“ (т.е noise) ефект од фотографиите, кој обично се јавува кога тие се сликани во опкружување со недоволно светлина – а за тоа не и треба ни референца од „чистата“ слика.
За да се креира овој филтер, истражувачите започнале така што додале noise на 50 000 чисти фотографии, а единствена разлика помеѓу нив бил изгледот на зрната кои им биле додадени. Потоа овие зрнести слики биле внесени во AI системот, кој бил истрениран да ги отстрани за да се добие чиста верзија на фотографијата, скоро идентична на оригиналната, пред тие да и се додадат.
Кога повторно го тестирале системот, тој можел да ги чисти фотографиите за неколку милисекунди.
Ова не е прв пат вештачка интелигенција да се користи за подобрување на неквалитетни фотографии. Во мај, истражувачи од Intel и универзитетот од Илиноис претставиле AI која можела да осветлува претемни слики – но за тоа да го стори морала прво да ги „види“ чистите т.е нормалните верзии од нив. Новиот AI систем на NVIDIA нема потреба од тоа.
Кога овој софтвер ќе биде на располагање на јавноста не се знае, а кога тој ден ќе дојде ќе може да се користи за разни намени – од астрономијата до медицината.