Нафтената компанија Royal Dutch Shell и софтверскиот гигант Microsoft создале систем со вештачка интелигенција (AI) кој може да помогне да се спасат нечии животи.
Овој пилот проект засега функционира на две Shell бензински пумпи, една во Тајланд и втората во Сингапур.
AI системот бара знаци на небезбедно однесување (како пушење на бензинска пумпа) и го предупредува персоналот за тоа – давајќи им шанса на луѓето да ги изгаснат (или воопшто да не ги запалат) цигарите пред да се случи некоја катастрофа. Тој исто така детектира доколку некој неправилно ја користи пумпата, доколку некаде протекува гориво и сл.
Системот ја користи Azure IoT Edge платформата на Microsoft, а анализата на содржината од сигурносните камери се случува на самите бензински пумпи.
На скоро сите локации на Shell има во просек 6 камери кои снимаат околу 200 мегабајти податоци за една секунда, а интелигентниот систем со анализирање селектира само мал дел од овие видео материјали (каде се случува нешто „сомнително“) и истите ги аплоудира во “cloud”-от каде подетално се анализираат.
Слична технологија би можела да се користи и на други локации, како на пример за предвидување на откажување на опрема во индустриски опкружувања.