Научници од Кина креирале нова лесна супстанца цврста како дрво, но за разлика од него, отпорна на оган и вода.
За да го креираат ова синтетичко дрво, научниците земале раствор од полимерна смола и додале хитозан, шеќерен полимер добиен од школките на ракчињата.
Оваа мешавина била исушена со замрзнување, со што се создала структура полна со малечки пори и канали, за потоа да биде загреана до температури до 200 °C, со што се зајакнале хемиските врски.
Крајниот резултат бил материјал кој е отпорен на кршење како природното дрво, а покрај тоа што е водоотпорен и огноотпорен, не му се потребни години за да израсне.
На примероците потопени во вода и киселини во период од 30 дена цврстината им се намалила многу малку, во споредба со природното дрво кое за тоа време изгубило 2/3 од цврстината и 40% од отпорноста на кршење. Новиот материјал исто така тешко се палел, а горењето му запирало веднаш штом бил тргнат од огнот.
Ова вештачко дрво би имало разни намени, а порозноста и капацитетот за заробување на воздухот го прави идеално за користење како изолација во живеалиштата.