Норвешката компанија „Retyre” пронашла полесен начин за менување на гуми на велосипед, односно за модифицирање на постоечките во на пример, гуми за возење во зимски услови.
По двегодишно развивање и тестирање, тие создале сет гумени „кожи“ кои можат со патент да се зацврстат врз веќе постоечките гуми или отстранат од нив за помалку од 60 секунди и кои не испаѓаат дури и при големи брзини или при остро вртење во кривини.
Retyre системот е составен од 2 дела – целосна гума со интегрирани странични патенти кои се монтираат на стандардниот бандаж и најмалку една retyre „кожа“. Со користење на лизгачки механизам и патент, возможно е инстантно да се додаде нова „кожа“ врз постоечките гуми која е поприкладна за возење на некој различен вид на терен.
Направени од 90% природна гума, на располагање се 3 „кожи“ – една за секаков терен, една која содржи карбид и е наменета за возење во зимски услови и една наменета за груб терен како што е шумскиот, или за возење по удолници.
Компанијата планира да направи „кожи“ во кои ќе бидат вметнати LED светла и електроника која ќе комуницира со смартфонот на возачот, како и онакви од специјални материјали како влакна од кокос и 100% гума која ќе може да се рециклира.
Гумите и кожите се на располагање во димензии од 26″, 27.5″, 28″ и 29″, во различни бои за да се поклопат со боите на велосипедот. Цените на основните гуми се движат од $36 до $70, додека на кожите од $55 до $70.