Морнарицата на САД потпишала договор со Boeing за 4 екстра-големи автономни подводни возила (XLUUV - Extra-Large Unmanned Underwater Vehicle) – со други зборови, за огромни дронови-подморници.
Наречени Orca (Орка), овие подморници ќе можат да извршуваат од извиднички мисии, па до потопување на бродови од големи далечини. Дрон-подморниците како Орка ќе ја револуционизираат морската војна, овозможувајќи евтини вооружени системи кои би се наоѓале во првите борбени редови или би се користеле онаму каде што опасноста е преголема за бродовите со екипаж.
Според договорот, Boeing ќе добијат 43 милиони долари за создавање, тестирање и испорака на 4 Орка возила, кои ќе бидат базирани на Echo Voyager технологијата вградена во подморницата користена за нејзина демонстрација.
Орка дроновите ќе имаат домет од 6500 наутички милји и ќе можат да функционираат автономно со месеци. Нивната димензија ќе биде 15 х 2,5 х 2,5 метри, а тежината 50 тони.
Технологијата вградена во нив ќе вклучува инертен систем за навигација, сензори за длабочина, а ќе можат и да испливуваат на површината за да ја фиксираат својата позиција преку GPS. Максималната длабочина до која ќе може да нуркаат е нешто над 3 километри, со максимална брзина од 15км/ч.
Подморниците ќе имаат модуларен систем за товар кој ќе им овозможува да пренесуваат различен вид на товар за различни мисии, со капацитет од максимум 56 кубни метри и максимална должина од 10 метри. Во нив ќе може да се вгради и Mk.46 лесно торпедо, како и Mk.48 тешко торпедо кое би се користело за напад на бродови.