Ford, компанијата позната по своите автомобили, создаде прототип на паметен кревет кој користи технологија со подвижни ленти за да оние кои спијат на него ги држи на „нивната страна“.
Автопроизводителот всушност ја адаптирал својата технологија за центрирање на возилата при возење во одредена лента, со која возилото се нагодува секогаш да вози на средината на лентата со помрднување на воланот во посакуваниот правец.
Ваквиот кревет е решение за проблемите кои се јавуваат кога на него спијат двајца од кои едниот има обичај често да „навлегува во лентата“ на другиот и да го турка кон работ, оставајќи му многу мал простор за комотно спиење.
За да се постигне тоа, сензорите за притисок детектираат кога личноста се преместува од едната на другата страна на креветот и таа нежно се поместува со помош на интегрираните подвижни ленти.
Овој кревет е креиран како дел од „Ford interventions”, проект со кој технологијата на компанијата се користи за справување со секојдневни проблеми. Други работи кои се дел од овој проект се и куќичката за кучиња која го елиминира надворешниот звук (огномети, петарди, автомобили итн.), и паметно креветче за деца – од кои сите се само во форма на прототип и не постојат планови во скоро време да се појават на пазарот.