Не е тајна дека Јапонија сака да ја искористи олимпијадата во Токио во 2020-та како платформа да ги прикаже „технолошките мускули“. Откако овој настан им беше доделен пред 6 години, тие постојано работат на користење на технологија за постигнување на различни цели како препознавање на лица за да се забрза влезот на спортистите, роботски такси сервис, па дури и медалите се направени од рециклиран електронски отпад.
Сега на сето ова се приклучува и Токио 2020 роботскиот проект во кој учествуваат експерти од компаниите како Panasonic и Toyota кои претставиле неколку роботи наменети за асистирање на посетителите на олимпијадата кои имаат посебни потреби или хендикеп.
Роботите за човечка поддршка (HSR – human support robot) и за поддршка на испораките (DSR – delivery support robot) изградени од Toyota, ќе работат заедно за да им асистираат на гледачите. HSR е машина висока еден метар со вградена рака за кревање на послужавници и корпи, додека DSR функционира како мобилна корпа за отпадок, но пренесува „грицки“ и останати производи нарачани преку апликација на таблет или смартфон. Официјалните планови се да бидат активни до 16 HSR и 10 DSR роботи, повеќето од нив на Олимпискиот стадион во Токио.
Овие роботи се дизајнирани да им помагаат на посетителите, особено на оние во инвалидски колички да носат храна и други предмети, како и да ги водат луѓето до нивните седишта овозможувајќи им информации во врска со настанот кој ќе го гледаат.
Од Panasonic, пак, покажале елек за асистенција кој овозможува поддршка на грбот и колковите на оние кои го носат, за да можат да креваат потешки предмети без да се повредат. Од компанијата велат дека планот е да се користат 20-тина вакви елеци за да им се помага на посетителите со нивниот багаж.